Gattuso pavaje ‘e nunn’esserse ‘mmentato coccosa pe ttené luntane ll’sulane dâ muntaca. Koulibaly tuosto e attiento. Manlas se facette rispettà da chi capitaje
‘A VEDETTE ACCUSSÍ
Che ddelusione e cche nervatura guagliú…Ma che ne parlammo a ffà. Ajere, ‘nfromme sapette ca â Varra p’’a trentesima vota ‘ncopp’a trentaquatto nce steva Mazzoleni dicette: “Cca ‘a facenna fete… chisto è vvenuto pe rromperce ‘o saciccio e nnun farece affuzzà (vincere)!” E, purtroppo nun me sbagliaje! Cumminfatte Napoli-Cagliari, sibbacco (match) d’’a trentaquattesima jurnata, ca nsi’ ô 94’ stevemo affuzzanno p’uno a zzero, se cunchiudette cu scuntraffatto russimmo (pareggio) p’uno a uno i ‘o Palazzo [addó cuntammo quanto ‘o doje ‘e coppe quanno ‘o triunfo è a mmazze!]nce arrubbaje n’ati dduje punte e ffovemo custrette a rallentà ‘a corza p’’a Ciampionsa. Caromecosta ce purtaje ‘nvantaggio [13’] cu ‘nu bbellu stuco (gol), po ne signaje pure n’ato, ma chella fetenzia d’ucummo (arbitro) [e ppo ve dico] senza mutivo ll’annullaje, mentre Nandez(ze) ô 94′ cartiannose primma ô Turco e ppo a Mezacucchiara, russimaje (pareggiò)e cce rummanette cu ttanto ‘e naso.Nun ve dico ‘e mmaleparole ca partetteno dâ tribbuna divano e cquanti muorte chiammajemo a ll’ucummo i a Mmazzoleni. Passammo ê ppaggelle.
MERET[‘O Lungagnone] 6,5 Pe ‘nu paro ‘e vote se chiammaje ll’applavuso, ma po ô 94’ avette ll’itimma (colpa) ‘e rummané bluccato ‘mporta senza ascí… Avesse pututo essere ll’ommo cupertina d’’o Napule. Peccato.
DI LORENZO 6 – Appressusaje (spinse) poco, ma difennette a cciammiello mettenno a musarola ‘mprimmose a Ssimeone.
MANOLAS[Chitelassa] 6 Se facette rispettà da chi capitaje, asasa (soprattutto) da Pavoletti ca solo ‘na vota riuscette a chiammà ‘ncausa ô Lungagnone.
KOULIBALY[‘O Ggialante] 7 -Tuosto, attiento, sicuro fove uno d’’e meglio d’’e nuoste, mo marcanno, mo chiudenno, mo lanzanno ê cumpagne lla ‘nnante.
HYSAJ[Mezacucchiara] 5 Atalossa (prova) aunesta, anze pozzo dicere ca facette ‘na bbona fijura nsi’ô 94’ quanno bbello e bbuono venette meno dint’ê ccuseture facennose surpassà ê spalle da Nandez(ze),ca ce futtette.
RUIZ[Anemalonga] 6 Urdinato e priciso scennette ‘ncampo cu riga e ccumpasso e cquanno guvernaje ‘a palla nunn’’a sprecaje maje. [da ll’81’ BAKAYOKO[‘O Mammone] s.v.]
DEMME 6,5 – Se facette apprezzà ‘mmiez’ô campo senza sbaglià ‘na palla; ‘e cchiú jette a ccercà ‘a porta da luntano cu ‘na cagliosa putente cuglienno ll’afachia (traversa) ca ancòra sta tremmanno.Applavuso.
LOZANO 5,5 Casinista, parette ca vuleva spaccà ‘o munno, ma ammuinatore cumme fove, ‘a fora ‘e ‘na tacatarrassa (colpo di testa) ‘mpriciso nun cunchiudette. [dô 67′ POLITANO 5,5 Cumbinaje poco,anze cchiú ppoco.]
ZIELINSKI 6 Cercaje ‘a porta da fora sfresanno (sfiorando) ll’addaffa (rete) e cquanno cupuliaje (dialogò) cu ‘o capitano dette sempe ‘a ‘mpressione ‘e putè fa nascere coccosa ‘e bbuono.[da ll’81’ ELMAS[‘O Turco] 4,5 Lassaje passà Nandez(e)’nnaccasiona d’’o russimmo e nnun ce ‘o pperdono!]
INSIGNE 6,5 Mannaje ‘mporta a Ccaromecosta cu ‘nu granne missiddo (assist),cupuliaje (dialogò) cu paricchi cumpagne ‘mmentannose bboni ficre (idee); peccato ca a ll’arrancua (nella ripresa) se ne scennette.
OSIMHEN[Caromecosta] 7 Cumme se muvette mannaje dint’ê chiavette ‘a trasera (difesa) isulana; signaje ‘nu bbellu stuco (gol)e sse ne vedette annullà, senza raggiona, n’ato. [(dô 75′ MERTENS[Ciruzzo] s.v.]
all. GATTUSO 5,5 Pavaje ‘e ccunzequenzie ‘e nunn’esserse ‘mmentato coccosa pe ttené luntane ll’sulane dâ muntaca (area di rigore) asasa (soprattutto) ll’urdema dicina ‘e minute. Peccato.
arb. FABBRI 3 E ll’aggiu trattato! Mannato, nchietta cu Mmazzoleni pe nnun farece affuzzà (vincere), ‘o ffacette siscanno pe ppartito pigliato contro a nnuje e cce annullaje, pe ssenza niente, ‘o doje a zzero ‘e Caromecosta senza manco jí a ccuntrullà ‘a Varra.
E bbasta accussí. Rassignammoce guagliú: tutto sta già scritto e ddiciso dint’ô Palazzo, addó nun cuntammo ‘nu saciccio… e mmo, mo se po’ ssulo tentà ‘e fà coccosa sapato ca vene jenno a dd’affuzzà cu ‘o Spezia â casa lloro… sempe ca ‘o Palazzo ce ‘o permette. Si ‘o Cielo ‘o vvo’ v’’o cconto dummeneca ca trase. Ciuccio fa’ tu! Staveti bbe’! R. Bracale Brak