Êva ‘a succerere, guagliú! Primma o doppo êv’ ‘a succedere ca ‘o Napule riuscesse a apprufittà ‘na grama vota d’ ‘e guaje ‘e ll’ate! E finalmente succerette ajere: ‘a Roma se facette vattere ‘ncasa dâ Fiorentina, ‘a Lazzio jette a abbuscà a Nnovara e ll’Udinese, idem cu patane,’e ppigliaje ‘ncopp’ê rrecchie ‘a ll’ Interre…..e ‘o Napule (‘assa fà â Maronna!) vincette a Llecce piazzannose â fine d’ ‘a jurnata a 54 punte a uno sulo dâ Lazzio e a dduje ‘a copp’ a Interre e Udinese! A chistu punto paresse ca ‘o Napule putesse pure cunquistarlo chillu cacchio ‘e terzo posto bbuono pe ‘nu posto ‘nciampionsa. Paresse…,ma i’ nun ‘a veco accussí facile penzanno ca sàpato a ssera s’ à dda jí a gghiucà a Roma contro â Roma.E è proprio chesto ca me preoccupa: jía vvencere a Rroma!
‘Ncundizione nurmale ‘o Napule po’ vvencere ‘ncopp’ a ‘nu campo cualuquiero (qualsiasi), ma nun pozzo credere ca ‘o Palazzo permette n’ata scunfitta d’ ‘a Roma ‘ncasa! E soprattutto cu ‘o terzo posto a purtata ‘e mano ‘e ll’Interre! Sperammo ca me sbaglio,ma aggio paura ca ‘o Napule s’è scetato tarde e mmo se fanno sèntere ‘e tre llardiate avute ricentemente! Stammo a vvedé e sperammo ca me sbaglio! Passammo ê ppaggelle:
DE SANCTIS 5,5 ‘Na parata,e ddoje asciute a vvacante.Troppo nervuso, lle jette bbona cu Muriello ca a ccunte fatte lle facette ‘nu rijalo!
CAMPAGNARO 6 Non avette muzzecà: ll’abbastaje ‘e latrà e ‘e liccise sparettero cu ‘a coda ‘mmiez’ê ggamme.Se nn’êtte ‘a ascí pecché se ‘nfurtunaje e quase certamente nun recupera pe sàpato!
(dô 62° FERNANDEZ 6 Se facette valé, pure troppo: súbbeto ammunito,se ripigliaje a mmaraviglia ‘nzzerranno a mmestiere tutt’ ‘e spazzie!)
CANNAVARO 6+ ‘O miraculo, ‘o miraculo!Se facette valé lla ddereto e piscaje ‘a matta ‘e ‘na signora ajuda pe Ccavani!
ARONICA 6 Attiento, jette assaje meglio ‘e ll’urdemi vvote sbruglianno senza míngule e ntíngule (senza fronzoli)quacche situaziona periculosa.
MAGGIO 6 Bbella ‘a rencontra d’ ‘o guaglione cuano; peccato sulo pe cchella rredda ca se magnaje ô primmo tiempo!
GARGANO 6,5 Quanno e addó fuje nicessario, lla se truvaje, ma sbagliaje quacche sustentazziona facile facile!
INLER 6 Nun fuje nicessario fà ‘o ‘ngignere, avastaje fà ‘o geometra, ma pittaje ‘a punizione p’ ‘a primma rredda, chella ‘e Marekiaro.
DZEMAILI 6 Pure isso s’accurgette ca nun era ‘o caso ‘e strafà e se limitaje a ffà ‘o nnicessario, senza esaggerà…
ZUNIGA 6,5 Vincette ‘a sfita cu Cuadrado,ma aizaje troppa porvéra.”Êsse ‘a dà cchiú sustanza e meno fummo!
HAMSIK 7 Miezu punto ‘e cchiú p’ ‘a rredda overamente bbella (dô 71° VARGAS 6- Êsse pututo sfruttà meglio chilli minute ‘e cchiú ca Mazzarri lle cuncedette.)
CAVANI 6,5 Se vedette ca nun steva ancòra ô mmeglio, ma dimustraje ‘a freddezza d’ ‘o campione quanno ‘nzerraje ‘a pratica ‘ncontropiede.( da ll’ 85° DOSSENA s.v. ‘O solito cagno inutile!)
All.MAZZARRI 6,5 Cu ‘na furmazziona praticamente ubbligata se purtaje â casa tre ppunte ‘mpurtante, sbancanno ‘nu campo difficile assaje.
Quanno se dice ‘a bbona sciorta!
Arbitro TAGLIAVENTO 6 Nun se facette scappà ‘a mano ‘a partita e riuscette a nun farla ferní a a mazzate.Menu male! Però fosseno state nicessarie quacche cartellino jalizzo o russo ‘e cchiú spicialmente cu chille d’ ‘o Lecce ca facetteno ‘e guappe e ‘e pruvucature!
E cu cchesto ve saluto e ringrazzio ‘e ll’attenziona.
Staveti bbuone e si dDi’ vo’ ce sentimmo â prossima vota!
Raffaele Bracale Brak