Napoli-Stella Rossa 3-1 – ‘A vedette accussì

Tutto a pposto ajeressera ô san Paolo guagliú! Cumme ce aspettavemo tutte quante e nnun rummanettemo chebbammelle (delusi) pecché, ato ca Napule – Chievo!…, ajeressera ô san Paolo ‘o Napule facette tutto ‘o duvere suĵo e vvattette ‘a Stella Rossa ‘e Bbercrato piazzannose, p’’o mumento, cu nnove punte ‘ncimma â crassifica d’’o javallo (girone) suĵo ‘nnante a, chi ll’êsse ditto?!, a pParísangermen(ne), e a Lliverpul(lo). ‘Nzomma guagliú

chillo d’ajere era ‘nu sibbacco (match) da vencere i ‘o Napule nunn ‘a fallette  cunzignanno tre guappi ppurpette passe e ppignuole  a ‘na Stella Rossa, ca  pe bbona parte d’’a mubbara (incontro) fove overamente artaraffo (irriconoscibile), cumme spisso le succede si nun ghioca â casa soja e nun fove cacchio né ‘e fermà, nè ‘e mettere penziero â scuatra d’’o Jancone ca fove prutacunista ‘e ‘nu sibbacco (match) ‘e granna mistaua  (livello),prupunenno ‘na pressiona (pressing) custante e dde qualità e ‘nu juoco divertente ca ‘e quarantacinchelia masciadde (spettatore) apprezzajeno assaje; doppo d’avé ccunchiuso ‘o primmo ajone (tempo) ‘ncopp’ô doje a zzero cu ll’addaffe ‘e Marekiaro a ll’11’ e dde Ciruzzo ô 33’ ‘e cuane [ajere cu ‘na maglia luvarda sfriggiata cu ddoje o tre fferze jalizze(gialle)] mantenetteno ‘o bbuccino d’’o juoco pure quanno turnajeno ‘ncampo  aumentanno ‘ o meizo (vantaggio) ô 52’ cu n’ata addaffa (rete) straurdinaria ‘e Ciruzzo  e, purtroppo, cinche minute doppo piglianno,da ‘nu metro e mmiezo,’nu stuco (gol) pe bbia ‘e Mario Rui [5 e ppo ve dico]ca n’a’ ppoco se levava ‘o cappiello pe ffà passà ll’avverzario  Bennabouhane, servuto a cciammiello da  Marin(ne). Fove tanno ca ‘a scuatre d’’e cuane (azzurri) dètte quacche segnale ‘e mancanza ‘e cuncentraziona, casa ca dètte ‘nu poco ‘e curaggio a ll’avverzarie ca però nun foveno crestiane ‘e fà nisciuna azziona cuncreta e ô 93’ quanno ll’arbitro spagnuolo dicette ch’era fenuta putettemo fistiggià pure ‘ntribbuna-divano.

A ‘stu punto p’’o trascurzo artairra (qualificazione) cu ‘a scunfitta a pParigge d’’o Liverpul(lo) ‘o Napule tene si nun tre, dduje natigge (risultati) jenno ll’unnice d’’o mese ca trase a  Anfield(de) e si overo ca niente ancòra è ddiciso, tutto è ancòra ‘int’ê mmane d’’a scuatra d’’o Jancone e mme pare ca ll’ artairra (qualificazione) st’anno nun vène meno!

Passammo ê ppaggelle:

Ospina [Pasta Crisciuta] 6.5: Facette tutto ‘o duvere suĵo e doppo d’averece fatto spaventà ô siconno minuto ‘e juoco quanno asciuto a fermà ‘nu pallone periculuso se ll’astrignette ‘mpietto e ffove arrunzato da ‘na crapa serba avverzaria ca ll’arrivaje ‘ncuollo ‘e corza cunzignannole ‘na bbotta, ca ‘o stennette ‘nterra, ‘int’ô denucchio; furtunatamente, curato a dduvere, se repigliaje e nnun fove nicessario ca trasesse ‘o Creco e dda chillu mumento difennette ‘e pale chellu paro ‘e vote ca fove chiammato a ffà coccosa cumme succedette ô 22’ quanno fermaje ‘na cunchiusione ‘e Simic(cio) ‘ncopp’ô palo ‘e dritta; niente però putette fà ô 57’ quanno cu Bennabouhane ca tiraje ‘a ‘nu metro e mmiezo ‘a Stella Rossa riuscette a ssignà ‘o stuco d’’a bbannera. Peccato.

Maksimovic 6: miso a ddritta  accumpagnaje, cumme putette ‘e pprimme repartite (ripartenze) dâ trasera (difesa) nosta; po dô 46’, asciuto ‘o Masto cauciato da ‘nu serbo, passaje a ffà ‘o siconne centrale e nnun sbagliaje. ‘O mmeglio però ll’êva dato primma a ll’11’ quanno ‘ncopp’a ‘nu tiro ‘e squina (corner) ‘e Ciruzzo  spezzecaje ‘a palla ‘e capa permettenno ô capitano, appustiato ô pizzo justo, ‘e sbluccà ‘o sibbacco (match).

Albiol [‘O Masto] 6.5: Guvernaje a mmestiere ‘a sezziona (reparto) e ffacette ‘nu miezu miraculo ô 22’ quanno salvaje ‘a porta da Simic(cio) doppo d’’o primmo tiro d’’o serbo; po tanta urdinaria amministrazziona senza sfregazze (sbavatura) primma d’essere custretto a sse nn’ascí cauciato malamente dâ solita crapa cu ‘a maglia rossa, manch’essa nutizziata (ammonita) da ll’arbitro spagnuolo [5 e ppo ve dico] troppo largo ‘e maneca cu ll’avverzarie d’’e cuane (azzurri).

[dô 46′  Hysaj [Meza Cucchiara] 5,5: miezu zifo (voto) mancante pecché sí fove  prutacunista ‘e quacche bbona chiusura e dde ‘nu cataro  (diagonale) ‘mpurtante, ma ce mettette  poca sustanza uffenziva.]

Koulibaly [‘O Ggialante)] 7: ‘o solitu culosso d’’a trasera (difesa) ca nun ‘a facette bbona a nnisciuno e sse facette apprezzà pure quanno scennette annante addirittura sfresanno ‘e capa ‘nu stuco (gol).

Mario Rui 5: ‘Nu zifo (voto) mancante pecché nun le pozzo perdunà d’esserse addurmuto cu ‘a zizza ‘mmocca facenno passà e signà a Bbennabouhane…. peccato pecché p’’o riesto ll’atalossa (prestazione) soja nun fove malamente.

Callejon [Peppe ‘a ‘nguenta] 6.5: Pure ajere bbella atalossa (prestazione d’’o spagnuoloca ce facette apprezzà pe ccumme mannaje ô manicomio a Rrodiccio ci ògne cata (taglio) suĵo; peccato sulo ca, purtroppo forze pe ‘na jastemma menata, nun riesce cchiú a ttruvà ‘a porta! P’o riesto, pe cumme se facette vedé,  ‘nteliggenza da strafottere

[da ll’ 85’ Rog – Nun avette ‘o tiempo ‘e mmeretarese ‘nu zifo (voto).]

Allan [‘O ‘Ncrifato] 6.5:’O solitu cane ‘e presa; secutaje pe ttutt’’o campo a cchi capitasse ricuperanno palloni aute p’appressurà (spignere) e arremmarrà (ripartire) mettenno ‘mpericulo ll’avverzarie; se sgunfiaje ‘nu poco sulo passanno ‘e minute.

Hamsik [Marekiaro] 7: ajeressera ‘o capitano me piacette: sempe a ccentro d’’o juoco, sempe prisente cu antjsse (recuperi) e andivinate istiglie (verticalizzazioni).’E cchiú fove isso ca se facette truvà ô posto justo pe recogliere ‘a spezzecata ‘e Maximovic(cio) mettennola dinto e sbluccanno a ll’11’ ‘o sibbacco (match

Fabian Ruiz [Anema Longa] 7: Se facette apprezzà p’’a cualità i ‘a sverdezza d’’e gghiutate fatte i ‘a pusizziona soja nun fove maje liggiuta dâ Stella Rossa.

Insigne [Lorenzigno] 5.5: miezu zifo (voto) mancante datose ca ajere ‘o frattese ce mettette ‘o ppoco ‘e cualità cupulianno (dialogando) cu cCiruzzo e Anema Longa, ma nun cercaje maje ‘a porta e ttutto summato ggiraje a vvacante.

[dô 76′ Zielinski 5: ‘Nu zifo (voto) mancante, me dispiace, pecché facette troppo poco p’’o tiempo avuto.]

Mertens [Ciruzzo] 7.5: Bbella atalossa (prestazione) ‘e ll’arillo berga ca ggià ô 5′ cercaje ‘e fà sgarrupà  ‘o san Paolo cu  ‘nu  tacco d’’e suoje e arrivate ô 33’ ce facette arrecrià accarezzanno, primma ca tuccasse terra ‘e dritto ‘a spalla ca lle furnette Anema Longa  e mmannannola ‘mporta, p’’o doje a zzero ‘nfra palo e ppurtiere. Cu n’atu capolavoro arrivate ô 57’se libberaje d’’o centrale e ppiazzaje ‘mporta ‘a cagliosa d’’o tre a zzero ca nchiudette ‘e juoche.

all. Ancelotti [‘O Jancone] 6.5: ‘o Napule suojo ‘e Ciampionsa facette scurdà chillo ‘e contr’ô Chievo e ffove bbello da vederese.

arb. Gil Manzano 5 – ‘Stu spagnuolo, grossi fetenzie nun ce ne facette, ma – cumme v’aggiu ditto – fove troppo largo ‘e maneca cu ll’avverzarie d’’e cuane (azzurri) e lle sparagnaje cchiú ‘nu cartellino jalizzo.

E ffermammoce cca, abbastanza suddisfatte ‘e cumme jetteno ‘e ccose ajeressera.Mo se torna a gghiucà p’’o campiunato e ssi ‘o Cielo ‘o vvo’ ll’appuntamento è ppe mmarterí 4 dicembre quanno penzo e putereve cuntà ca llunnerí  a ssera jenno a bBergamo  contr’a ll’Atalanta [scuatra assineja (satellite) d’’a vecchia zoccola]  ‘o Ciuccio nun s’è fatto  sciaccà, anze à vinciuto  mettennose tre ppunte dint’â sacca. Accussí spero.

Staveti bbe’