Tengo ‘o bbeleno nfi’ a ‘mpont’ô musso e ancòra nun ce pozzo credere ca ajeressera a Empoli ‘o Napule sbracaje malamente e ppigliaje quatto chianette dâ scuatra ‘e Sarri ca ajeressera pareva ‘o bBarcellona mentre ‘e cuane me parevano chille d’ ‘a Procadavere/scavate. Chesto pe ddicere ca ajeressera nun ce fove antrassa (partita) e ca ‘o Napule cunfermaje ‘a sensazziona ‘e nun ce stà nè ccu ‘a capa, nè cu ‘e ccosce. Ca nun fósse stata ‘na passiata ggià se sapeva cunzideranno ‘a sufferenzia dint’ ô fullè (match) d’affarta (andata) contr’ê tuscane [afferrato p’’e capille ‘ncopp’ô doje a ddoje] e cunzideranno ‘o fatto ca se trattava ‘e ‘na trasferta scamosa addó ‘o Napule nun aveva maje vinciuto; d’accordo, se sapeva ca nun fósse state ‘na passiata, ma ajeressera ‘o Napule esaggeraje malamente e ògne ccuano cercaje ‘e mezze ‘e jucà peggio d’’o cumpagno… Naturale pirciò ca fenesse cu ‘na scunfitta pesante e mme faccio maraviglia ca nun fenette peggio.
E ddicere ca ‘ntribbuna divano ce facevamo curaggio penzanno cu ll’arbitro Massa nun s’era maje perduto… Purtroppo ce sta sempe ‘na primma vota e cchella fove ajere! Ora mo a ‘stu punto êss’ ‘a fà ‘e ppaggelle…, ma cu ‘a collera ca tengo ‘ncuorpo nun ce ‘a faccio; nun vale ‘a pena ‘e metterese a ssuttilizzà: zimmare e crapette una mbulletta, mecco tre a ttutte quante e ll’aggiu trattate!
E cu cchesto ve saluto e si ‘o Signore ‘o vvo’ ce sentimmo llunnerí ca vene, speranno ca dummeneca a ssera ô san Paolo, contr’ô Milanno, ‘e cuane nun facesseno risuscità ‘e muorte! Staveti bbe’!
R. Bracale Brak