Niente ‘a fà, guagliú: nun se riuscette a vvencere e ajere a ll’ora d’’o limuncello a mMarassi, contr’ô Genoa fernette cu ‘nu scunzulato zero zero e ‘o Napule perdette ll’accasione, si êsse vinciuto, d’angappà ‘ncimm’â crassifica a interre e ffiorentina. ‘Mmece niente ‘a fà nun fove pussibbile centrà ‘a sesta nichemata (vittoria) cunzecutiva e c’êttem’ âccuntentà ‘e appena ‘nu punto doppo n’atraffa (partita) scamosa, tosta, e tutto summato sfurtunata cu tre o quatto accasione ‘mpurtante perdute pe ‘nu niente e ssenza cuntà ca, facenno ‘e cunte sott’ô lampione, chella fetenzia ‘e ll’arbitro rumano Doveri cecaje a vvedé, ma nun siscaje ‘nu ricore a ffavore d’’o Pipita tirato ‘nterra sotto porta ‘a Burdisso. E accussí fenette ca pure attaccanno scunzideratamente pe tutta ll’ n’atraffa (partita) a ll’urdemo c’êttem’ âccuntentà ‘e appena ‘nu punto, stracque, strutte i ‘a cesta rotta! C’è ppoco ‘a fà, quanno nun è ddestino, nun se vence. I ajere nun fove destinato ‘e vencere. Steva scritto ca se fósse pariggiato e sse pariggiaje e sciuliajemo ô quarto posto ‘ncrassifica cu vintiduje punte, addó – vincenno – fóssemo state primme a vvintiquatto.Pacienza! Passammo ê ppaggelle:
REINA 6 – Passaje ‘na bbona mmità d’’o fullè (match) a aspettà ‘nu periculo dê pparte soje, ca nun arrivaje i ‘a primma e ssola parata ll’êtt’ ‘a fà a ‘nu quarto d’ora dô prazzo (termine); p’’o riesto fove assaje ‘nteliggente quanno se tuffaje e nun tuccaje ll’avverzario ca si no chella fetenzia ‘e Doveri fósse stato cacchio ‘e siscarle ricore contro!
HYSAJ 6,5 – Ô pprincipio se facette nutà sulo pe ‘nu prubblema ê cazettune, ma po se ll’êtte ‘a vedé cu rRincònno e pPerotti ma lle mettette ‘a musarola: cchiú ô primmo ca ‘o siconno ca quacche fastidio ‘o dètte.
ALBIOL 7 Bbella atalossa (prestazione )d’’o spagnuolo ca vincette cu pPavoletti tanti dessaffíe (sfide) dirette,senza correre maje particulare riseche, e respingette ‘na cifra ‘e pallune cu ccegna (grinta) e pricisione.
KOULIBALY 7,5 Prisente ‘ncopp’a ògne ppallone fove ‘na certezza; pruvaje a llanzà e ffacette chiusure ‘mpurtante comme a cchella ‘ncuollo a lLacsalta; signaje pure ma steva ‘nnettopaida (in fuorigioco).
GHOULAM 6,5 Appressuraje (spinse) ‘ncopp’ô curridojo suojo tante ‘e chelli vvote soprattutto durante ô primmo ajone (primo tempo); a ll’arrancua (nella ripresa) se cuntentaje ‘e mantené ‘a pusizziona.
ALLAN 6 Chella d’ajere nun fove certamente ‘a meglia atraffa (partita) soja, ma ‘a corza i ‘o muvimento ca facette vedé, cuntajeno e ccomme! Ascette distrutto (stremato). (Da ll’81’ D. LÓPEZ s.v.)
JORGINHO 6,5 – Bbella atalossa (prestazione )p’’o brasiliano usservato spiciale da ll’Arsenàllo; durante ô primmo ajone (nel primo tempo) cercaje ‘e crià juoco e nun appena putette ricuperaje pallune puliteliche (preziosi); a ll’arrancua (nella ripresa) cupuliaje (duettò) a mmestiere cu mMarekiaro e urtizzaje (verticalizzò) pe gGabbiadini facennose sèntere pure dint’ê cuntraste.
HAMSIK 5,5 Uno d’’e poche ch’êsse avuto fà assaje ‘e cchiú e nun ‘o ffacette, rennonese utile sulo a ll’epate (fase) ‘e cuntrasto, ma maje sotto porta avverzaria addó jettaje a mmare ‘nu paro d’accasione e comme passajeno ‘e minute accussí se ne scennette ‘e pressiona. Peccato!
CALLEJON 6 Nun fove apàtiso (abulico) comme contro ô Palermo, anze fove decisamente cchiú vivo, ma fove assaje ‘mpriciso sotto porta. Eppure avesse avuto, êsse pututo e soprattutto avesse vuluto mettere ‘na firma sotto a ‘nu stuco (gol), ma nun ce riuscette;ce tentaje quase subbeto doppo pochi minute, ma Perinno lle dicette ‘e no, po Ansaldi lle levaje ‘na bbella palla dint’â camma (area). (Dô 67′ GABBIADINI 5 Tagliaje spisso verzo â camma ‘e ricore genuana apprufittanno d’’e spazzie arapute dô Pipita, ma cumplessivamente ajzaje sulo porvere; perdette n’accasione nun aggancianno n’urtizzazziona (verticalizzazione) ‘e Jorginho. Trutterellaje a vvacante e sse facette ammuní comme a ‘nu fesso;tentaje cu ‘na timmurria (punizione), ma Perinno riuscette a ssalvà ‘o tiro poco periculuso).
Higuain 6 Sfurtunato, facette chello ca puteva fà cuntrullato a ssanguetta ‘a Bburdisso:tanti pallune spizzate p’’e cumpagne, tentaje ‘e centrà ll’incrocio cu ‘na castagna, po Ansaldi e rPerinno fermajeno ‘nu bbellu tiro ‘e dritta;quanno Burdisso s’’o carriaje ‘nterra sotto porta tirannolo p’’e spalle se chiaitaje ‘nu ricore sacrusanto ca Doveri nun lle vulette dà. Se prupunette sempe pure quanno, fattu mio (egoista), levaje ‘na palla dê piere d’Insigne.
Mertens 6,5 ‘Na vota tanto partette titulare e ggià ô 27’, doppo d’’e primmi minute facette ‘a bbarba ô palo cu ll’accasione cchiú ssapurita d’’a primma mez’ora. Se dètte da fà assaje e cunzignaje a mMarekiaro ‘nu granne pallone ca ‘o capitano sciupaje; peccato ca pe nun saccio qua’ ‘mpicciofove custretto a ascí.
(Dô 57′ Insigne 6 Se vedette ca ll’êsse vuluto fà; cu ‘o primmo pallone ricuperato mettette ‘ncundizzione a cCagliecònno ‘e tirà ‘nu bbellu diacunale; cuntinuaje a ricuperà palle e cquacche vvota s’accentraje, ma inutilmente.Peccato! )
Sarri 6 Tutto summato facette chello ch’êv’ ‘a fà ncarranno pure ‘o rutizzio (turnover) ‘nfra Insigne e Mertenso,ma ll’antraffa fove troppo scamosa e ttosta soprattutto p’’e ttante marcature genuane a ssanguetta e ppe quacche ppasiglio (passaggio) sbagliato a ccentrocampo.Però ‘e cuane (azzurri) continuajeno a crià azzioni ‘e qualità, ma sia Caglieconno ca Marekiaro e Gabbiadini sprecajeno cchiú ‘e ‘na bbona palla, senza scirdarce d’’o ricore ca Duveri nun détte a ffavore d’’o Pipita!Distrutte dâ fatica ‘e cuane falletteno ll’uppurtunità d’aggancià ‘a cimma d’’a crassifica. Pacienza, se ne parla n’ata vota!P’’o mumento, senza scuraggiarse s’à dda guardà annanze tenenno presente però ca p’’e pprossime antraffe (partite) s’à dda penzà a ‘nu rutizzio (turnover) cchiú sustanziuso visto ca quacche titulare nun sta ‘ncundizziona fisica e s’à dda rrepusà ‘mpanca. E nun sto’ ghiastemmanno!
E cu chesto ve saluto e ce sentimmo, si dDi’ vo’, llunnerí ca véne doppo ll’antraffa(partita) casalinca cu ll’Udinese. E abbiàmmo a ffà corne, sicure però – sinamparco (comunque) – ‘e turnà a vvencere! Staveti bbe’!
R. Bracale Brak