Gattuso quase certamente nun se magna ‘a pastiera

E cche ce vulite fa guagliú? Simmo nate pe suffrí e ppure ajeressere nce attuccaje n’ata amara delusiona:
Atalanta-Napule,sibbacco (match) d’ejudo (di ritorno) d’’e sfarnaje (semifinali) ‘e Coppa Itaglia,jucato a Bbergamo se cunchiudette cu ‘nu ‘nfamo tre a uno p’’a Dea; ‘e Zapata[10’] e Pessina [16’ e 78’ ] ‘e stuche (gol) ‘e ll’Atalanta, mentre ô Napule nunn’ avastaje[ô 53’] ‘o mumentanio uno a ddoje ‘e Lozano. Cusicché nce va ll’Atalanta e nno nuje a vvedersela cu ‘a vecchia zoccola p’’a dissaffia (finale) ‘e Coppa Itaglia.

Pacienza e ppassammo êppaggelle.

OSPINA 6,5 Nun tenette itimme (colpe) ‘ncopp’ê ttre addaffe (reti) ‘e ll’Atalanta. Doppo d’’o doje a uno tenette ‘mpere ‘o Ciuccio cu ‘nu paro ‘e tacculle (interventi) decisive primma d’ arrennerse a ‘nu scatenato Pessina ca trasette centralmente dint’â muntaca (area di rigore) nosta cumme a ‘nu curtiello caudo dint’ô bburro senza ca nisciuno facesse coccosa p’ustacularlo.

DI LORENZO 5,5 – Mubbara (partita ‘e granna sufferenzia: dâ parta soja ggiustraje ‘nu Gosens(o) ca si sta ‘e ggenio nun se po’ cuntrullà; ‘ncopp’ô tre a uno cercaje ‘e chiudere a ccentro, ma nun riuscette a ffermà a Ppessina!

MAKSIMOVIC [‘O ‘Ntontero] 4 Troppe sfregazze (sbavature)e mmancanza d’attenziona. Êsse avut’’a guvernà ‘a traserà(difesa), ma chi t’’o ddà? Nun trasmettette nisciuna ammanna (sicurezza) â sezziona (al reparto) e ll’Atalanta trasette dint’â muntaca (area di rigore) nosta centralmente cumme e cquanno vulette! ‘Ncopp’ê primmo stuco (gol) tre ‘e lloro: isso, Mezacucchiara i ‘o Mammone se guardajeno lassanno a Zzapata spazzio e ttiempo ‘e s’accuncià ‘a palla, piglià ‘a mira e piazzà ‘a cagliosa

RRAHMANI 5 Se capette poco cu ‘o ‘Ntontero e spisso nun sapette che fa; è overo ca è gguaglione e ssenza ‘sperienzia e ca ‘ncopp’ô doje a zzero ‘a jucata ‘e Zapata fove eccezziunale, ma isso rummanette fremmo cumme a ‘na statua ‘e sale! E cche saciccio!

HYSAJ[Mezacucchiara] 5 Se vedette poco o niente annante e arreto ascette tarde a ppresà a Zzapata ‘nnaccasione ‘e ll’uno a zzero. [dô 42′ Mario RUI 5,5 Appena appena ‘nu poco meglio ‘e Mezacucchiara. Troppo poco!]

ELMAS [‘O Turco] 4,5 Tuccaje poche pallune e cquase sempe cu ppasiglie (passaggi) arreto; êsse avut’’a custruí ‘o juoco e nnun ‘o ffacette pecché nunn’è arta soja.
[dô 46′ POLITANO 5 Se vedette poco o niente; nun cercaje ‘a porta, né dètte chillu cagno ‘e passo ca fósse servuto ô Napule p’adderezzà ‘a varca!]

BAKAYOKO [‘O Mammone] 4 Bbatejo (lento),muiccaddo (macchinoso) e ssenza ficre (idee) jette dint’ê chiavette mo cu De Roon(ne), mo cu Freuler(re). Nunn’avastaje a ffarele mmeretà ‘e cchiú chella sola ica (percussione) a ffavore ‘e Lozano ‘nnaccasione ‘e ll’addaffa (rete) nosta.
[dô 64′ DEMME 6 Trasette e ssubbeto fove sustanziuso affruntanno Ilicic(ce) pe nnun farele tirà a’mporta libbero e ffranco; po mettette ‘ncopp’ô pere ‘e Caromecosta ‘o pallone ca fósse pututo essere chillo d’’o doje a ddoje, ma ‘o niggeriano nunn’ ‘o sfruttaje. Peccato!]

LOZANO 6,5 Se cunfermaje ‘o cchiú ‘mpalla d’’e nuoste, partette bbuono e ssubbeto Palomino ll’êtt’’a mazzià p’’o fermà;durante ô primm’ajone (nel primo tempo)se mantenette luntano dô juoco po Gattuso se decidette a spustarelo a mmancina e lla mettette paricchio ‘ndifficultà ll’ avverzarie muvennose e accentrannose e rriuscette a ffarece sperà signanno terco (caparbio) e ccuraggiuso ll’addaffa (rete) d’’o doje a uno!

ZIELINSKI 5 Serata no: nun tenette ficre (idee) nun ce mettette nè ccegna (grinta) nè azzaja (impegno), nun arrivaje maje a cunchiurere né stette vicino a Ccaromecosta. Ascette doppo cchiú ‘e n’ora: troppo tarde! [dô 64′ LOBOTKA 6 – Se piazzaje ‘mmiez’ô campo facenno ‘o ssuĵo cu riga e ccumpasso.]

INSIGNE 5 Fove poco zincatejo (incisivo) proprio quanno ô Napole fósseno servute ‘e gghiucate soje, mentre dint’ê primme quarantacinche minute fove ll’unico a ccercà ‘a porta ‘e Gollini.

OSIMHEN [Cariomecosta] 5 Vattuto mungiamiente (sistematicamente) dê centrale d’’a trasera (difesa) bergamasca tentaje ‘e tené auta ‘a scuatra, ma poco ce riuscette; avette ‘na bbona palla ô 75’ ma nun riuscette a ttruvà ‘a porta e mmenarla dinto! Steva scritto accussí. Pacienza.
[dô 79′ PETAGNA s.v. Trasette a ccose fatte e pputette fa poco o niente.]

all.: GATTUSO 4,5 Oramaje stammo a ‘o punto ca quase certamente chisto nun se magna né bbeneditto, né ppastiera. Ajere n’ata azzimma (sconfitta) pesante cu n’ato ubbiettivo falluto doppo chillo d’’a Supercoppa. Ajere mannaje ‘ncampo ‘na furmazziona sballata: tu vaje’ncasa ‘e ll’Atalanta addó puó ppure russimà (pareggiare) ma signanno, t’attocca ‘e nun puté ausà ‘a chietta centrale d’’a trasera (difesa) cu Cchitelassa i ‘o Ggialante e tt’hê arrangià cu ‘o ‘Ntontero e Rracmani…,ma nun puó tenerte ‘mpanca uno cumme a Ddemme pe ppuntà ‘ncopp’ a cchella scala pe ccogliere ‘e ffiche ‘e Bakayoko ca nun dà, cumme nun dette ‘na mana â trasera (difesa), né puó ffà ‘a soccia cosa cu Llobotka ch’è ll’unicu raggiuniere ‘e ll’armidanno (centrocampo) ca tiene pe mannà ‘ncampo ô Turco ca ‘mpratteca facette poco e nniente… Cunchiusione: cu ‘na trasera (difesa) ca ‘ncacagliava, cu n’armidanno (centrocampo) senza cegna (grinta) né fficre (idee)ne venette fora ‘nu primmo ajone (primo tempo)nuosto ca nun se putette guardà cu ‘na scuatra, ‘a nosta, ca deva ‘a senzazzione ‘e nun se sapé movere e ffove nurmale ca jessemo ‘nsotto ‘e ‘nu paro ‘e stuche (gol).Se nn’êtte addunà ca êva fa coccosa, ma, turnate ‘ncampo pe ll’arrancua, ne cacciajemo sí e nno ‘na riazziona fatta cchiú ‘e nievere ca ‘e ficre (idee). E a nniente servette!

arb.: LA PENNA 5 Ato ca penna! ‘Stu pecuraro nunn’è manco ‘nu lappese scugnato. Ajeressera siscaje pe ppartito pigliato contra a nnuje e nne nutizziaje (ammoní) quatto d’’e nuoste: Mezacucchiara, Zielinski, Di Lorenzo, Insigne perdunanno a cchiú’e ‘nu lucale ca cumme Lozano o Caremecosta pigliaveno palla, p’’e ffermà, ‘e vvattetteno.
E bbasta accussí. Dammoce n’atu pizzeco ‘ncopp’â panza e gghiammo annante. Mo, si ‘o Cielo ‘o vvo’ ce sentimmo dummeneca ca vène pe ccuntarve chello ca succede sapato mmerz’ê sseje ô Maradona contro â vecchia zoccola. E Sperammo CA Gattuso ‘ncarra ‘a furmazziona…
Staveti bbe’!