Le pagelle in lingua di Napoli-Verona: l’arbitro Ayroldi ‘e riffe o ‘e raffe facette ‘o duvere suojo. 5 a Mario Rui, Ospina da 6
Che nervatura e cche delusione guagliú. Niente, nun fove cosa! Ajere ‘mmerz’ê sseje ô Maradona avettemo ll’accasiona ‘e levarece ‘a cuollo chella mignatta d’’o Milan(no) vattenno ‘e pariente ‘e chella zoccola ‘e Giulietta… e ‘mmece chi t’’o ddà?! Ajere ancòra ‘na vota ‘O Verona nce fermaje e c’êttem’’a cuntentà ‘e ‘nu scunzulato uno a uno; pe ffurtuna ‘nserata pure ‘o sibbacco (match) ‘nfra ‘o Milan(no) i ‘a Bbisciona se cunchiudette cu ‘o meresemo russimmo (pareggio), cosa ca ce cunzentette ‘e nun perdere ‘a cimma d’’a crassifica, ma no ‘e rummanerce sule. E tutto chesto pecché ‘e nuoste nun foveno capace ‘e vattere ‘e verunese anze foveno custrette a repigliarle, datose ca ô 13’ Rrahmani nun riuscette a ccuntrastà a Ssimeone e lle permettette ‘e signà da pochi passe; e mmenu male ca cinche minute doppo Di Lorenzo, sciso ‘nnante, sfruttaje ‘na bbella palla d’Anemalonga e cu ‘na straccarellata ca passaje ‘mmiez’ê ccosce ‘e Montipò ce mettette ‘ncopp’a ll’uno a uno; da chillu mumento êssem’avuto ‘ncasà ‘a mana e ddarece da fà pe vvattere ê verunese, e ‘mmece perdettemo tiempo, passanno ‘o riesto d’’o primmo ajone (tempo) a sturià ‘e mmose da cuncertà senza cunchiurere ‘nu saciccio; piezzo e ppejo a ll’arrancua (nella ripresa) quanno ‘a scuatra s’allungaje senza rummané cumpatta e nnun fove capace ‘e fà valé ‘a qualità d’’e nuoste facenno girà palla senza farese furzà a ccagnà juoco quanno nce arrivajeno ‘ncuollo cu ttanto ‘e chella foja e cchella arraggia grannosa cumme si avessen’avanzato coccosa d’’o vviecchio e ll’êsseno vuluto sott’ô colpo. Cusicché jette a ffení ca nun s’affuzzaje (vinse) e c’êttem’’a cuntentà ‘e ‘nu russimmo (pareggio) ca però, a ccunte fatte è mmeglio ‘e ‘na cauce dint’ê rine.
Passammo ê ppaggelle:
OSPINA[Ecchesepastacrisciuta] 6,5: Nun putette fà niente ‘ncopp’â zampata d’’o Ciulito ca tiraje da troppo vicino senza ca Rrahmani riuscesse a ‘mpedecarlo (ostacolarlo); ‘ncumpenso salvaje ‘o natiggio (risultato) fermanno tre cunchiusione periculose ‘e Barak(che) e ccumpagne.
DI LORENZO 7,5: ‘O meglio d’’e suoje duranteô primmo ajone (nel primo tempo) e nnun sulo pe ll’addaffa (rete), ma pecché se facette vedé paricchio dint’â camma cauda (zona calda) e ttenette ‘a curzia soja senza farese surpennere.
RRAHMANI 5,5: Che peccato! Ll’aggi’’a levà miezu zifo (voto) pecché nun riuscette a ccuntrastà a Ssimeone facennolo signà, ma po affruntaje ll’arrancua (ripresa) sgrimma (ruvida) cu ‘a cegna (grinta) justa.
JESUS 6: Certo nunn’è ‘o Ggialante, ma furnette n’atalossa (prestazione) urdinata e ssenza fessarie pure quanno ‘a scuatra s’allungaje.
Mario RUI 5: Nun lle pozzo perdunà d’esserse fatto cartià a Barak(che) ca s’ ‘o zucaje zumpannolo ‘nnaccasione d’’o stuco (gol) verunese.
Fabian RUIZ 6,5: Atalossa (prestazione) da mutirro (regista) cu ‘a perna d’’o missiddo (assist) justo pe Ddi Lorenzo.
André ZAMBO ANGUISSA 6,5: Martiello d’armidanno (centrocampo), se muvette a mmestiere pe ffà saglí ‘e suoje e sse facette apprezzà pure cu ‘e muvimente ‘ndivinate ca libberajeno ‘e cumpagne. Peccato ca nun truvaje maje ‘a porta.[da ll’86′ MERTENS[Ciruzzo]6,5 Surtunato; trasette e ccugliette ‘o palo cu ‘nu tiro d’ arcasia (punizione)]
POLITANO 6: Serío (veloce) e aspierto (propositivo) fove mudarato (frenato) da Ceccherini e nun se vedette cumm’êsse vuluto, furnette ‘nu bbuonu missiddo (assist) a Ccaromecosta ca però cugliette ‘o palo.
[Dô 62′ Lozano 5,5: Miezu zifo (voto) mancante pecché trasette i avette subbeto ‘na bbona accasione ca sprecaje malamente, jettanno a mmare ‘a bbella palla ‘e Caromecosta
ZIELINSKI 5,5: Miezu zifo (voto) mancante pure a issonun cumbinaje ‘nu saciccio galliggianno ‘nfra ê llinie cuntrastato da Dawidowicz(zo) e cumpagne.
[Dô 62′ ELMAS[‘O Turco] 5,5: Ll’aggi’’a mettere pure a isso miezu zifo (voto) mancante pecché facette capa e mmuro contro ll’aculla (diga) aizata dê verunese.]
INSIGNE 5 : ‘Mprattica tentaje quacche ghiucata, ma fove sempe chella sbagliata; se vede ca ‘a maglia cu ‘a faccia ‘e Maradona nun lle porta bbuono. Spalletti s’’o chiammaje ‘mpanca troppo tarde!
[Da ll’87’ OUNAS: s.z].
OSIMHEN[Caromecosta] 6: Se mettette a ddispusizziona pe ddiammà (appoggiare),pure pecché pallone ‘nnamecca (in profondità) n’arrivajeno poche; cugliette ‘nu palo cu ll’unica palla bbona avuta. Peccato!
[Dô 91′ PETAGNA: s. z.]
all. SPALLETTI 6: Purtroppo se sentette ‘a mancanza d’’o Ggialante; ‘o Verona fove ‘na scuatra scamosa e nnun avastaje presentà ‘e nuoste mise a mmestiere ‘ncampo… Peccato!
arb: AYROLDI 6 ‘E riffe o ‘e raffe facette ‘o duvere suojo.
E ffermammoce cca.Pacienza, dammoce ‘nu pizzeco ‘ncopp’â panza e icnè (comunque ) penzammo pusitivo: nun tutto è pperduto; mo ‘o campiunato se ferma e se ne parla ‘nfra quinnece juorne quanno dummeneca vintuno ‘o Ciuccio va a Mmiliano contr’â Bbisciona; si ‘o Cielo ‘o ccunzente ve ne parlo ‘o llunerí doppo.
‘E cchiú, ‘e cchiú, ‘e cchiú Ciuccio fa’ tu!