Petagna facette a spurtellate cu Rromagnoli cu ccugna e ccuraggio, trattenenno e difennenno palla, e ffacenno spazzio cumme nn’accasione d’’o stuco (gol) d’’o Turco
MILAN-NAPOLI [19.12.21] 0 A 1 ‘A VEDETTE ACCUSSÍ
Canta Napule guagliú, Napule ‘nfesta p’’o Ciuccio ca ajere a ttarda sera jette ô Meazza a scardà ‘e ccorna ê riavule russe e nnire ‘e Pioli e a ppigliarese tre ppunte cauzante… ca lle permettetteno ‘e purtarese a 39 punte ‘ncrassifica, sicunno ‘nchietta cu ‘o Milan(ne) a sule quatto punte dâ Bbisciona…. E nnunn’è ccosa ‘e niente! E ddicere ca sule poche se fosseno jucato ‘o doje, sule poche avesseno scummettuta pure ‘a cammisa ca ‘o sibbacco (match)
Milan-Napoli, fósse fenuto cu ‘o natiggio (punteggio)’e zero a uno pe nnujaute.E mmece proprio accussí fenette cu ‘o Napule ca affuzzaje (vinse), ringrazzianno ll’addaffa (rete) d’’o Turco ca ô 5′ mettette a ffrutto ‘nu granne tiro ‘e squina (corner) ‘e Zielinski. E da chillu mumento, putimmo dicere ca ‘e juoche foveno fatte, datose ca ‘o Napule cu ttutte ll’arzubbatte (difficoltà) p’’a faglia (mancanza) ‘e jucature ‘mpurtante,avenno truvato qquase subbeto ‘a strata d’’o stuco (gol) putette ggestiunà (gestire) ‘a mubbara (partita) cumme meglio credette senza maje sufferí (subire) ‘a mubbadara (l’iniziativa) d’’e patrune ‘e casa, ca tutto summato facetteno acqua dâ pippa, mentre ‘e nuoste cca e lla facetteno vedé pure tincielle (sprazzi) ‘e bbuonu juoco ch’êsseno pure pututo addivintà mumente periculuse o pure addaffe (reti). Però mo pe ‘na cosa, mo pe n’ata nun se putette recogliere ca ll’uno a zzero… troppo poco p’’o cinquantadoje pe cciento ‘e tenuta ‘e palla napulitana. Ma s’affuzzaje (si vinse) e cchello avastaje! Passammo ê ppaggelle:
OSPINA [Ecchesepastacrisciuta] 7: Nunn’êtte ‘a fa cape d’angiulo, ma s’’o mmereta p’avé fermata ‘na cunchiusiona malegna, a mmazzo, d’Ibra, pe ‘nu paro d’asciute aute pronte e ssicure ô niajo (nel finale) e dduje tacculle (interventi) ‘e pere fora muntaca (area di rigore) nosta. MALCUIT [‘O Tignuto] 6,5: se magnaje ‘a ferza ‘e dritta facenno disperà mo a Rrade Krunic(cio) mo a Bballo-Touré; spisso jabbraje (crossò) e ccurrette nsi’ ô 96’ sempe mascullo (lucido).
RRAHMANI 8: ‘Mpratteca bluccaje ògne mubbadara (iniziativa) rossa e nnera dimustranno d’essere funnamentale p’’a trasera (difesa) nosta.
Juan JESUS 7: ‘Ncumpagnia ‘e Rrahmani, cuntinua a nnun fà pesà ‘a faglia (l’assenza) ‘e ‘nu Ggialante cumme a Kcoulibaly.
DI LORENZO 6,5: Miso a mmancina facette vedé cegna (grinta) corza e tacatamme (anticipi) ‘e sustanza.
ZAMBO ANGUISSA 6: Nunn’è ancòra isso e sse vedette; ô primmo ajone (nel primo tempo) perdette ‘nu paro’e pallune pwericuluse, ma all’arrancua (nella ripresa) strignette ‘e diente e sse facette rispettà.
DEMME 6: Facette ‘o ssuĵo ‘ncopp’â linia d’’a mediana senza sfregazze(sbavature) pure si nunn’è cumpletamente a pposto bbenniamente (fisicamente)
[Dô 54′ LOBOTKA 7: Trasette cu ‘a cegna (grinta) justa cuntrastanno e mmartellanno quanno e addó fove nicessario.
LOZANO 6: Tutto summato ‘nfra ‘e cchiù pusitive; mancaje però d’adracca (di concretezza). Peccato.
[Dô 77′ POLITANO 6: Trasette ‘int’ô chiuovo quanno fove nicessario strignere ‘e riente e ffà aculla (muraglia) pe difennere ll’uno a zzero e dette ‘na mano a ffà ‘o nnicessario.
ZIELINSKI 8: Presente ‘ncopp’a ttutta ‘a camma (zona) d’attacco, furnette n’atalossa (prestazione) da ‘ncurnicià dimustranno ‘e mmeretarese ‘a scolla ‘e capitano, senza scurdarce ca fove isso a ttirà ‘o tiro ‘e squina (corner) ca ‘o Turco mettette a ffrutto!
[Dô 77′ OUNAS [L’Anguilla] 5,5: Êsse pututo fà ‘e cchiù
ELMAS [‘O Turco] 7,5: Cunfermaje ‘e attraverzà ‘nu mumento assaje pusitivo, dànno filo ‘a torcere a Fflorenzi e e asasa (soprattutto) truvanno subbeto ‘a porta pe ll’uno a zzero ca ce furnette tre ppunte cauzante.
[Da ll’86’ Faouzi GHOULAM: sv.
PETAGNA 6,5: Facette a spurtellate cu Rromagnoli cu ccugna (grinta) e ccuraggio, trattenenno e difennenno palla, e ffacenno spazzio cumme nn’accasione d’’o stuco (gol) d’’o Turco.
[Dô 78′ MERTENS 6: Pochi ccose, ma fatte a mmestiere]
All. SPALLETTI 8: Troppi ffaglie (assenze) pe vvedé ‘nu Napule spettaculare,ma cuntavano ‘e tre ppunte e cchille ‘a scuatra se purtaje â casa cuntantanno ‘o muntarribbo (l’allenatore) ch’êva addimannate ê suoje ‘e fa vedé ‘nu Vesuvio.
arb. MASSA 5 Gestiunaje (gestí) ‘e cartelline jalizze (gialli) a ccapa ‘e saciccio e dô 5’ abbiaje a ssiscà pe ppartito ‘pigliato, contr’ê nuoste, pe nnun parlà d’’o stuco (gol) fasullo ‘e Kessie ca êsse cunvalidato si nun êsseno miso ‘e ccose a pposto chille d’’a Var(ra).
E bbasta accussí, alliccammoce ‘e bbaffe e guardammo ‘nnante. E mmo si ‘o Cielo ‘o ccunzente ce sentimmo ggioverí ca vene e pparlammo d’’a brica (scontro) cu ‘o Spezia ‘e miercurí a ssera ô Maradona. .‘E cchiú, ‘e cchiú, ‘e cchiú Ciuccio fa’ tu! Staveti bbe’