Maggio nun è cchiú isso, Mazzarri nun ‘nventaje

‘O Napoli ajere s’appresentaje a Rroma contro â Lazzio ‘e l’ecchese Reja, a ll’ora d’ ‘a tiella pe tentà ll’ennesimo córpo esterno prufittanno ‘e ll’entusiasmo d’ ‘a vittoria ‘e Cagliare ca aveva rilanzato ‘a squatra napulitana dint’ê ppusizzioni ‘e ponta.’Mmece fernette a ppisce fetiente e ‘o Ciuccio se zucaje ddoje caramelle e i’ me ‘ntussecaje ‘e vermicielle cu ‘nu zuchillo sciué sciué ‘e ppummarole pelate, ‘o filettino ‘e chianina ‘na vutata e ‘na ggirata e ‘a mela annurca. ‘O fatt’è ca Mazzarri êtte ‘a fà a mmeno ‘e Gargano squalificato ‘e Aronica ‘nfurtunato e mettette (nun ll’êsse maje fatto!) a ffà ‘o centrale ‘mmece ‘e ll’ecchese Cribari a culo’echiummo-cannavaro…. E che ne putevamo sperà? Pe gghionta ‘e ruotolo se ‘nfessette a ffà mettere ê jucature chella funerea, jettatoria divisa blu-savoia ca è ‘na vita ca vaco prerecanno ca porta ‘na jella futtuta… e nun me vonno credere! Mettimmoce pure ca Maggio e Marekiaro ajere comme ajere aizajeno sulo póvera,mettimmoce ca Bergonzi ce mettette ‘o ssujo e ‘o quatro è cumpleto…. ‘Nzomma è bbastata ‘na Lazzio appena appena passabbile pe farce scetà d’ ‘o suonno ca ce stévamo sunnanno e simmo turnate ‘a Roma cu dduje scippe ‘nfaccia e Rreja è turnato a ffà ‘o vallo ‘ncopp’â mmunnezza!Mo nun ce rummane ca levarce dummeneca ca vène ‘e paccare ‘a faccia scuntannòcela cu ‘o Bbologna! E sperammo ca nun me sbaglio; venimmo ê ppaggelle.
DE SANCTIS: 5. Meno pronto d’ ‘o ssolito e meno sicuro pure si sulo dduje miracule avessero pututo scanzarce dê golle lazziale, e isso nun è attrezzato pe ffà miracule!
GRAVA: 5,5. Sempe presente â bbannera, ma ajere generalmente suffrette ‘a velocità ‘e ll’avante lazziale
(dô 62° SOSA: 6. Nun mancaje ‘a fantasia e ‘a supponta (l’appoggio), ma sotto ‘e duje golle è difficile assaje pe chiunque trasí e cagnà faccia â partita. Periculosa ‘na bbotta soja ca facette ‘a varva ô palo.)
CANNAVARO: 3. È ‘nu guajo passato! Fosse meglio si se ne jesse a Ddubbaje ‘nzieme ô frato! Arrancaje senza ‘arrivarlo appriesso Zarate lanciato ‘nvelocità dinto a ll’azzione del vantaggio; lassaje sulo sulo a Floccari dinto a ll’azzione d’ ‘o siconno gollo; ‘nzomma sistematicamente suffrette ‘o muvimento ‘e Zarate, ‘a fatica annascusa (il lavoro oscuro) ‘e Floccari, o ‘a reggia d’ Hernanèsse: troppo pe uno comme a isso; Mazzarri ‘o mettette a arranfechïarse ‘ncopp’ a ‘nu specchio e isso cumm’infatte cercaje ‘e s’arrampecà, ma – comme ô ssolito… – nun ce riuscette e nun ce puteva riuscí: nun è mestiere sujo!
CAMPAGNARO: 6+. ‘O meglio d’ ‘o cumplesso addietrato. Partette a mancina, po parlanno ‘a stessa lengua ‘e Zarate, Mazzarri ce ‘o cunzignaje. Cu ttutto ‘nu prubblema â nnacca (gluteo) assicuraje preziose e generose diagunale difenzive. Tornaje a mmancina quanno se mettetero a cquatto: nchiudette e rilanciaje.
MAGGIO: 4 È da ll’inizzio d’ ‘o campiunato ca nun è cchiú isso; Ched’ è ca nun va? Fisicamente ce stesse pure, ma che fine à fatto ‘o lustrore (la lucidità)’e ll’allunghe (degli affondi) e d’ ‘e taglie ‘a attaccante agghiuntato? Me sto’ chiagnenno a Mmannini!
( dô 54° ZUNIGA: 5. Jucaje ‘ncopp’ â curzia soja, chella ‘e dritta ma fuje fumuso, alternaje quacche bbona jucata, difenziva e prupusitiva, cu ati ghiucate pazzoteche (cervellotiche) e scamose.
PAZIENZA: 5,5. Bbuono ‘o pressingo pe stuppà ‘e ripartenze lazziali,ma troppa ‘mprecisione dint’ê rilance. Suffrette abbastanza ‘a velocità atletica e de penziero ‘e Hernanesse.
YEBDA: 5,5 Provaje a ccummannà ‘e tiempe d’ ‘a quatriglia e a accurcià ‘e reparte, ma ajere fuje ‘nu poco ‘mballato rispetto a ll’urdimi vvote e suffrette ‘o muvimento d’ ‘o centrocampo lazziale e pure ‘e ll’attaccante ca accurciavano.
VITALE:6 – Fuje cunvincente sino a cquanno se trattaje ‘e smèstere (spingere), ma Lichsteiner fuje n’uosso tuosto ‘a spurpà!
HAMSIK:4,5 Abbulico, apatico,senza idee e senza ggenio; nun se ‘nventaje niente nè comme attaccante, nè comme rifinitore.
(dô 78° DUMITRU: sv. Tanta voglia, tantu ggenio,ma nisciunu custrutto.)
LAVEZZI: 6,5. Fuje ancòra ‘o core d’ ‘o Napule ca nun s’arrenne maje; sfurtunato e faticatore: bbellissimo ‘nu stoppo ‘ncorza, ‘a applavuso nu ‘ncrocio ‘e pale, ca si fosse trasuto cagnava tutt’ ‘a partita! Nun è da ajere ca joca oramaje comme primma ponta e pure si fuje poco servuto pruvaje ‘a sulo a mmettere ‘ndifficultà ‘a retroguardia janco-azzurra.
CAVANI: 5,5. Currette, currette e facette tantu movimento a servizio d’ ‘a squatra, ma ggiustraje troppo largo e difficilmente riuscette a libberarsi ô tiro: nun le riuscette ‘o bbisso d’ ‘o siconno gollo fatto ô Parma!
MAZZARRI: 4. Sbagliaje justo ‘a partita ca nun êsse maje avuto ‘a sbaglià… Nun ‘ncarraje ‘a formazzione (Cannavaro, Maggio e Hamsik nun avevan’ ‘a essere convocate) e ritardaje ‘e sostituzzioni ( trasettero troppo tarde sia Zuniga ca Sosa). Senza scurdarce ca Reja carrecato e aggiurnato mannaje ‘ntilto ‘a fase ‘e cuntenimento d’ ‘e napulitane dint’ê primme minuti.
Nun lle riuscette ‘e leggere ‘e taglie uffenzive lazziale e nun se ‘nventaje niente pe ddà cchiú aria â manovra accuntentannose sulo d’ ‘o Pocho cundannato a pruvarce cu surtite perzunale!À dda tènere cchiú curaggio e quanno s’à dda tirà ‘na mola, se ll’à dda tirà!
L’arbitro BERGONZI 3 e ll’aggiu trattato!
Cu ttutto ca ‘sta meza cazetta ‘e sischetto, assicuratore genuvese, ati vvote ce avesse purtato bbuono, chesta vota era stato mannato p’accurtà ‘e passe ô Napule e pe gghiella nosta c’è riuscito! Paricchi ati vvote ll’avévamo ‘ncruciato e ccierti vvote aveva purtato bbuono,ajere no! E i’ nun ‘o vulesse cchiú; nun è scartellato, è ‘na meza cazetta comme ô riesto ‘e tutte ll’arbitre italiane; facilmente se fa ammagagnà e se porta ancòra appriesso ‘o pisemo d’ ‘e critiche ca avette p’’e duje rigure date ô Napule (staggiona 2007/2008) contro â juventússa; ‘a tanno, quanno arbitra ‘o Napule, pe fa vedé ca nun stà abbaccato cu ‘e napulitane sisca sempe contro e ‘nzerra tutte ‘e dduje ll’uocchie e s’appila ‘e rrecchie… Cumminfatte ajere pigliaje ‘nu zzarro esaggerato ô 15° minuto nun accurgennose o – dicimmomeglio – nun vulennose accorgere ca Zarate, primma ‘e freddà a De Sanctísso, s’era purtato ‘o pallone annante cu ‘nu vraccio, e cchiú ttarde facette cu ‘e napulitane ‘na fijura ‘e seje sorde quanno ( era ‘o 31°) Grava cu n’intervento pulito pulito aveva levato ‘o pallone a Floccari e ‘stu ‘nfamone ecchese atalantino ca è comme a ddicere quase juventino (visto ca juventussa e Atalanta stanno abbaccate) s’era menato ‘nterra… cercanno ‘e farse rialà ‘nu ricore,embé isso ‘mmece ‘e cazziarlo e d’ammunirlo pe simulazzione aveva fatto correre facenno credere ca forze ‘o ricore p’ ‘a Lazzio ce steva, ma ca isso nun ‘o deva p’apparà ‘a strunzata fatta ô 15° minuto… Ma che se crere st’arbitro, ca nuje scennimmo d’ ‘a muntagna? Ce ne simmo accorte bbuono ca comm’arbitro va seje sorde dâ parta d’ ‘o ggruosso e difatte sino â fine d’ ‘a partita dimustraje ‘e stà cu ‘a capa dint’ ê nnuvole o d’essere ‘ncunfusione futtuta e ammagagnata (in malafede), ribbaldanno (invertendo) spisso spisso falle e rimesse laterale, siscanno a ccapocchia e ssempe a ffavore d’ ‘a Lazzio. Nurmalissime cuntraste ‘e juoco pe ‘stu sischetto chino ‘e fauzaría addiventajeno addirittura mutivo d’ammunizzioni, mentre po trattenute pe dereto nun fujeno maje sanziunate cu ‘o cartellino giallo.Tutte cose ca ‘ncampo europeo facessero discutere, soprattutto trattannose ‘e fatte decisive comme ‘o gollo ‘e Zarate! Curiuso assaje po, pe uno ca è sischetto ‘nternazionale, ‘o fatto (ô mumento d’ ‘o primmo ‘nfortunio ‘e Brocchi), ‘e tracchiggià, tenenno ‘mmano quase p’aspettà ca se fernesse ‘e ccurà ô jucatore primma ‘e ripiglià ‘o juoco. P’ ‘a cronaca e tanto pe chiarí quanto è ammagagnato ‘stu sischetto v’arricordo ca â ffine partita ll’ammunite risultajeno ‘nu sulo lazziale: Dias e ‘a bbellezza ‘e tre nnapulitane: Grava, Campagnaro e Ssosa.N’atu fatto simpatico è cchisto: curreva ll’85° quanno ‘nu svenimento a uso ‘e sceneggiata ‘e Pino Mauro, in area ‘e Bresciano pruvucaje ‘e pruteste d’ ‘e tifuse e d’ ‘e jucature lazziale; ‘o cuntatto, s’era visto chiaramente, nun c’era stato,e ce fosse vuluto ‘o cartellino ggiallo pe simulazzione. Ma isso fermo, zitto e muto!
‘O Napoli pure ‘sta vota, ajere fuje aiutato dâ mala sciorta, perdette ‘na partita ‘mpurtante e ll’arbitro lle dette ‘na mano ‘ncopp’â scesa! Aggio raggione o no a ddicere ca mettennole tre ll’aggiu trattato bbuono?
E nchiudimmola cca; se ne parla llunnerí ca vène doppo ‘a pratica Bologna speranno ‘e turnà a ccorrere…
Ce sentimmo.
Brak