Me parono mill’anne ca fernesce ‘stu campiunato, ca vène ggiugno e se risolvono tanti facenne. Nun ne pozzo cchiú innanzitutto ‘e sentí ‘e parlà ‘e Mazzarri, ‘e st’ummenicchio senza parola,ca à ‘ngagnato (deluso) ‘na città sana,’na città ca ll’êva dato ammore, affezzione (affetto), ca ll’êva fatto addiventà ‘o nummero uno…; ati vvote so’ stato assaje tuosto cu ‘o signurino DeLa e ll’aggiu trattato a ppisce ‘nfaccia, dicenno ca isso e Mazzarri so’ ffiglie a ddoje maruzze: uno fète e ll’ato puzza… Ma ‘sta vota penzo ca ‘o signurino DeLa volte ave raggione: ma comme ‘o livurnese quanno firmaje e se ‘mpignaje nun sapeva qual’era ‘o programma d’ ‘a suggità? Ma ‘o gghiesse a ccuntà a n’ato… ‘Stu granne chiachiello mustòfaro s’ è ssempe cumpurtato malamente: a Ggenova,a Llivorno,a Rreggio,ma nun s’à dda permettere d’ ‘o ffà cu Nnapule! ‘O napule è ‘nu punto ‘e arrivo e nno ‘nu punto ‘e partenza e cchesto ‘stu caccialappàscere (bifolco, inetto) se ll’ à dda mettere bbuono dint’ê chiocche! Ce à arruvinato ‘a festa cu ttutte chelli dichiarazzione e cchiacchiere soje (,Resto!!! No non resto!!! O forse sí!!!!! Mi devo sedere al tavolo con il presidente.. (pe farse ‘na magnata o ‘na scopa a mmano a mmano?))’Stu bbabbuasso favone e bbizzauto (questo sciocco chiacchiarone e mercenario à cumpletamente squilibbrato (totalmente destabilizzato) ‘a squatra e ll’ambiente tutto; mo pirciò se nn’à dda jí ca nun è ddegno cchiú ‘e ll’affezzione e ‘e ll’ammore ca ‘stu popolo tifoso ll’êva dato! Avesse pututo, si fosse stato meno chiachiello ‘e chello ch’è fà ferní ‘e n’ata manera ‘o suggiorno napulitano suĵo e certamente ‘a ggente napulitana ll’avesse sbattuto ‘e mmane e ll’êsse fatto ll’augurie…. e ‘mmece…….mmece mo paricchie ‘o stanno facenno ‘e muorte (e forze nun ànno tuorto!) Mo spero sulo ca dummeneca, pure senza Cavani e Mascara se facesse, pure cu n’ata pastetta…, chistu beneditto urdemu punto ca ce serve e arrivate ô 95° ‘o presitente désse a Mazzarri ‘nu caucio ‘nculo e nn’ ‘o cacciasse, chiammanno n’ata vota a Rreja ca ‘e pallone ne capisce poco, ma è ‘nu viecchio signore serio e ca mantène ‘a parola!!!! N’urdema cosa: me parono mill’anne ca fernesce ‘stu campiunato, ca vène ggiugno e se risolvono ati facenne; oltre a cchella ‘e Mazzarri, chella ‘e Lavezzi ca pare ggià s’è accattato ‘na casa a Mmilano accasannose cu ll’Interre, chella ‘e Cavani ca pare à dda jí ô Milanno e cchella ‘e Marekiaro ca pare à dda jí â juventussa ‘nzieme a Michelino Pazienza.E se nne jessero, se nne jessero, tanto so’ ttutte mustòfare (mercenari)! S’è rrotta ‘a pazziella; pacienza! Ce nn’accattammo una nova!
R.Bracale Brak