Esimio don Aurelione, cunzentiteme ca i’, ca so’ ‘nu poco cchiú staggiunatiello ‘e vuje, parlasse chiaro pe ddicere ca i’ credo ( e cu mme paricchi tifuse ‘o ccredono ) ca Napule s’ ammereta ‘na squatra granne cu ghiucature ‘e primmero gliano (di primissimo piano)o forze addirittura ‘e privato (dettaglio)e vvuje ca facite ‘o cinematrofaco îsseve ‘a sapé ‘e che se tratta…’Mmece – a cquanto pare – ‘o maneggio (la dirigenza), apprufittanno d’ ‘a passione e ‘e ll’ammore d’ ‘e tifuse, è cumprumiso sulamente (impegnata esclusivamente) a llucrà e a ppiglià p’ ‘e funnielle (a prendere in giro) ‘e tifuse , ca nun ce ‘o mmeretammo, tenenno cunto ‘nfra ll’ato, d’ ‘e cunzistente e ‘mpurtante cobbre (incassi) ca âmmo permiso. Me pare e ce pare a nujeate tifuse ca fósse arrivato ‘o mumento ‘e schijà ‘e ccarte ‘nterra e de raggiunà cu ‘a capa ‘e coppa…; me pare e ce pare ca fósse arrivato ‘o mumento d’ essere razziunale, mettenno pe ‘nu mumento ‘e parte ‘a passione e ll’ammore p’ ‘a bbannera luvarda, pe raggiunà no ‘ncopp’ê cchiacchiere, ma ‘ncopp’ê fatte ca (p’ ‘o mumente) so’ cchiste: mazzeca e uno, aumento d’ ‘o gasto (costo) ‘e ll’ abbunamento, siconno quanto âte dichiarato vuje stesso don Aurelió; mazzeca e ddoje tutte ‘sti ffamose cummerzive (frenetiche) attività ‘e calcio mercato a che so’ apprudate? Ca s’è perzo a Inlerro (eppure se ne steva parlanno ‘a cchiú ‘e n’anno, tanto ca si fósse venuto a pede ‘a Udine nfino a Nnapule, fósse ggià arrivato); s’è perzo a Criscito; nun è maje stata ‘ntavulata ‘na seria e cuncreta discussione per Borja Valero;âmmu pigliato a gratisse a Donadel(lo) e – forze – a Dezmailì, refunnennoce però a Santacroce (e pe furtuna a Blasi)’a fora ‘e paricchi surdacchielle; âmmu perzo a Michelino Pazienza rijalannolo â juventussa e ssempe â juventussa ll’âmmu fatto ‘o sconto ‘ncopp’ô pacamento ‘e mmerdarella…; e fraditanto ll’attaccante d’’o Groningen ( mo nun me ricordo ‘o nomme) mo nun vo’ vení cchiú e nun se sape bbuono ‘o ppecché; a pparte chesto nun âmmo tenuto ‘a forza ‘e mettere ciento evere dinto a ‘na bbusta e âmmo, nuje ca nun tenimmo ‘nu bbuono attaccante ‘e scorta… e ‘o jammo cercanno, âmmo perduto a Denisso, ‘nu guaglione,‘nu vero attaccante garzo(giovane), tuosto, capace e cchino e bbona vuluntà, ca nun tène ‘a guallera o ‘e calle comme ê varie Trezeguet(to) Amauri o Iaquinta, ca pure se nne fanno ‘e nomme p’ ‘e ffà vení sott’ô Vesuvio…; mentre sempe a evere zzero pe furtuna âmmu riscattato a Mannini sulo pecché ‘a Sampedoria sta cchiú ‘nguajata ‘e nuje! Pecché tutto chesto esimio don Aurelione, pecché? Nun è ‘na dimanna, don Aurelió; vuje ‘o ssapite ‘o ppecché e a proposito,facimmoce ‘na resata: ‘nu nepote d’ ‘o mio turnanno ‘a ‘nu viaggetto fatto a Llondra addó se campa ‘nfra l’ato, ‘e turismo e de ‘nu maravigliuso cummercio, m’ à ditto ca à nutato ca ‘ncopp’ a ttutte ‘e gaggettese (tutti i gadgets) ce sta ‘a faccia ‘e ‘nu componente d’ ‘a famiglia riale. E nun me risulta ca ‘a riggina pretenne dê cummerciante o dê suggette (sudditi) ‘e rilevante jusse ‘e grabbato (i relativi diritti di immagine) O me sbaglio, don Aurelió?!
R.Bracale Brak