Eccuce cca guagliù. Ve cunfesso ca dâ partita d’ajeressera a Bergamo me fósse aspettato tre ppunte e ‘mmece è fernuta ca ce simmo accuntentate e ‘nu punto sulo, anze forze ‘e … duje mettenno pure chillo ca s’abbuscaje Campagnaro pe ‘nu cazzotto ‘nfaccia ca l’arapette ‘ncopp’ô zzicomo… Ma lassammo perdere ‘sti fessarie e penzammo ca stevamo abbuscanno pecché ‘o Tanke (ca d’ ajeressera nun m’è cchiú cumpagno…) s’êva levato ‘e pprete dâ scarpa e ce aveva miso sotto signanno ‘na bbella redda e abbuscannose sittantacinchemila evere (ca nun songo nucelline) ‘e premio p’essere arrivato a ddiece redde! Dich’ i’ mo: “Germano justo cu ‘o Napule ll’avive ‘a fà?…” Pe ffurtuna nosta a ll’urdemu siconno ‘o Matador(ro) ce mettette ‘na granna pezza e riuscette a pariggià, accussí ce apparajemo e ce appriparajemo, muralmente repigliate, â partita ‘e marterí ca vene contro â rubbentus(sa) ca pe pparta soja ajeressera arricettaje ‘a Lazzio ‘e Reja pure si ‘na bbona mana ll’avette ‘a ll’arbitro ca, ô ssolito, nun vulette vedé ‘na falta ‘e mane ‘e Barzagli e nun détte ‘o ricore â Lazzio. Sperammo ca mo marterí ca trase ‘a scummassemo ‘e sanco nuje â vecchia zoccola janca e nnera! Passammo ê ppaggelle:
DE SANCTIS 6 Putette fà poco e nniente ‘ncopp’â redda d’ ‘o Tanke; p’ ‘o riesto quacche paura, ma cumplessivamente poca fatica.
FERNANDEZ 5,5 Accuminciaje ‘a partita pusitivamente, po s’ammusciaje ‘nu poco pecché (e nnisciuno me leva ‘a capa…) ‘stu guaglione è poco adatto pe ‘na difesa a ttre e désse ‘o mmeglio jucanno a ccentro cu ‘na difesa a cquatto… ma jatencello a ddicere a Mmazzarri!
(dô 68° MAGGIO 6 Bravo a ccruzzà (crossare) all’urdemo all’urdemo ‘na palla praticamente perza, p’ ‘o riesto facette chell’êv’ a fà senza esaggerà…)
CANNAVARO 5 Bbone ‘nu paro ‘e chiusure, facenno spisso a vvarrate cu ‘nu Tanke assatanato ca ‘o futtette passannolo annante comme a ‘nu treno (quanno Campagnaro smarrunaje) jennose a ppiglià ‘o pallone senza ca ‘o capitano nun dico ‘o bluccasse, ma ‘o guardasse allimmeno stuorto!
CAMPAGNARO 5 ‘Na puttanata accussí ccrossié (grossolana) ‘a isso nun me ll’êsse maje aspettata, ma purtroppo ‘e smarrunà càpita pure ê meglie… E nun ce scurdammo ca steva ancòra stupetiato p’ ‘o cazzotto ‘nfaccia ca l’êva rutto a ssanco!
ZUNIGA 6- Jette bbuono durante â primma parte, po Colantuono pigliaje ‘e contrommesure juste e ‘o giuvinotto fernette d’appressurà comme aveva fatto.
DZEMAILI 6 Mancaje coccosa pe ffà addeventà iupèrfana (superba) n’aunesta prestazzione nurmale.’O ggiuvinotto (visto ca ‘o ssape e ‘o ppo’ fà) à dda sfruttà meglio ‘o tiro ‘a fora…. (dô 73° SANTANA s.v.)
GARGANO 6,5 Garbuso e ufèlimo (generoso ed utile) comme a ssempe, ajeressera dimustraje stranamente d’essere pure cchiú priciso cu ‘e passagge!
DOSSENA 5,5 Partita senza zuco e senza sale. Appressuraje poco e malamente, ma pure ‘e cumpagne nun ll’ajutajeno!
HAMSIK 5,5 ‘Mpartenza, si nun me sbaglio, parette ca ‘o vvuleva fà,ma po ‘nu poco ‘a stracquezza, ‘nu poco ‘a mancanza ‘e curaggio ‘e fà chello ca sape fà sparette dâ partita.
PANDEV 5,5 Ê vvote esaggeraje, vulette cumplicarse ‘a vita iuperballanno (strafacendo) e nun lle riuscettero ‘e ghiucate pure ‘e cchiú facile. Fisicamente però assaje repigliato(in ripresa).
( dô 72° LAVEZZI 5,5 M’ aspettavo assaje ‘e cchiú dô Pocho; sperammo ca se ll’è astipato pe marterí…)
CAVANI 7 Pe tutt’ ‘a partita se sarificaje assaje, ma pe bbona sciorta d’ ‘o Napule se facette truvà ô mumento adatto e ô posto justo pe signà all’urdemu siconno ‘na redda assaje pesante,assaje ‘mpurtante e mmeretata!
ALL. MAZZARRI 6- Per furtuna ‘a scuadra se scanzaje ‘na scunfitta ca fósse stata pesante specie p’ ‘o murale! Nun se vo’ mettere ‘ncapa ‘e nisciuna manera ca quanno à dda fà pe fforza ‘o “turnover” avesse ausà ‘nu motulo diverzo!
Arbitro ORSATO 4,5 E ll’aggiu trattato a ‘sta carta cunusciuta ca ausaje sistematicamente dduje pise e ddoje mesure, siscanno contro ê napulitane â primma ‘ccasione e cuncedenno ‘mmece ê bergamasche ‘e vattere scientificamente ê napulitane senza mettere lengua comme capitaje quanno nun me ricordo chi rumpette a ssanco ‘a faccia a Ccampagnaro…
P’‘o riesto direzzione senza troppi prubbleme e menu male ca ‘nfra ‘nu cartellino jalizzo e n’ato sventagliate sott’ô naso d’ ‘e nuoste, lassaje perdere ô Pocho, ca giacché è diffidato si ll’êsse ammunito,fósse stato squalificato e avesse po avuto ‘a zumpà marterì ‘a partita cu ‘a rubbentus(sa).
Cunchiudenno vuje mo putite dicere ca ‘nu punto a Bbergamo è stato poco e pperò i’ dico meglio ‘nu punto ca ‘nu caucio ‘int’ê rine!
A miercurí, si dDi’ vo’! Staveti be’!
R.Bracale Brak