Che delusione guagliú e che arraggia! Pecché i’ nce credevo e m’ero fatto ‘ncapa a mme ca ‘o Napule forte d’ ‘o tre a uno ‘e ll’annata ce ll’avesse fatta a superà ‘o turno apprudanno ê quarte d’ ‘a Ciampionsa… e ‘mmece, ‘mmece nun fuje accussí.
E ggià! Pecché ‘o ffruscià fa bbene â salute sí, ma ‘o fatt’è ca ce ponno cchiú ll’uocchie ca ‘e scuppettate e ‘o fatto me fuje chiaro quanno ajeressera ‘ncopp’ô doje a zzero d’ ‘e ‘ngrese n’amico (sotto sotto tifoso juventino, pure si fa vedé ca tifa p’ ‘o Napule, ma i’ ‘o saccio comme a sette denare e nun me fa fesso…), ‘stu granne cestariello, assettato ‘ntribbuna divano dicette: “Mo signammo, facimmo ‘o doje a uno e ppo lloro ne fanno n’ato…, accussí ce vedimmo pure ‘e supplementare!” Nun fuje cosa ditta, ca se verificaje e comme jette a fferní ‘o sapimmo bbuono e è da ajere a nnotte ca tenco ‘a vocca amara comme ‘o ffèle! Che peccato, che peccato! Ajeressera âmmo sciupato ‘nu sangradale!E quanno ce ricapita cchiú n’uccasione símmela? Pe mme chi nce ave ‘a causa e ‘a corpa ‘e ‘sta delusione è ‘nnante a ttutte Mazzarri! E che saciccio! ‘O ssapevano pure ‘e ccriature ‘e ll’asilo ca ‘e ‘ngrese avessero fatto tanti cruzze nn’area, pe sfruttà ‘e ccapate ‘e Drogba e ssocie, e cchillo Mazzarri che fa, ‘mmece ‘e ‘nfultí ‘a difesa, jucaje cu ‘a solita difesa ca quanno va bbuono s’abbusca sempe ddoje o tre rredde…; ll’avessero capito pure ‘e ccriature ‘e ll’asilo ca visto comme stevano jenno ‘e ccose avevano ‘a trasí Fernandez(zo) e Britos(so) pe cercà ‘e dà ‘na mana a Ccannavaro e a Ccampagnaro cu dduje àvete, oppure metterne uno sulo e fà trasí Dzemaili a dà ‘na mano a centrocampo, jucanno cu una ponta,assistita ‘a ‘nu centrocampo rinfurzato; e ‘mmece doppo d’essere stato custretto a sustituí a Maggio acciaccato, se nfessette a nun cagnà cu ‘o risultato ca ‘a difesa, cu cchiú ‘e ‘nu rijalo, permettette ô Chelsea ‘e fà ‘na ddia ‘e fijura! A ‘nu certo mumento me venette ‘a penzà ê difenzure napulitane d’ ‘o ppassato: Comaschi, Bruscolotti, Ferrara, Fabio Cannavaro; Fósse avastato uno sultanto ‘e chiste ch’aggiu ditto e ‘a scuatra nosta êsse pututo fà ‘nu granne zumpo ‘e qualità!Overamente peccato!
E cchesto p’ ‘e respunzabbilità ca tenette Mazzarri. P’ ‘e cchelle ‘e chille ‘mmiez’ ô campo ne parlammo doppo. P’ ‘o mumento m’attocca ‘e ringrazzià cumunque ‘a scuatra napulitana ca ce à fatto sunnà e ddico ca chesto è ‘o fatto pusitivo d’ ‘a scutuliata d’ajere!
Passammo ê ppaggelle:
DE SANCTIS 5,5 Nun tenette grossi respunzabbilità ‘ncopp’â primma e ‘ncopp’â cquarta rredda,ma ne tenette assaje ‘ncopp’â siconna quanno nun chiammaje ‘a palla a Campagnaro, e ‘ncopp’â terza êsse pututo fà coccosa ‘e cchiú, a pparte ca me facette fà ‘e capitune ‘ncuorpo quanno ascette. ‘E bbuono ‘na bbella parata ‘ncopp’ a Drogba; ‘e sbagliato n’asciuta a vvacante ca nun custaje cara sulo pe ‘na falta retissante ‘e Torres(so).
ARONICA 5 Serata storta: perdette quase tutte ‘e cuntraste a ttu ppe ttu e ‘ncopp’â primma rredda se scurdaje cumpletamente ‘e Drogba. ( Dô 110°VARGAS s.v.)
CANNAVARO 4,5 Pe ‘na chiena (salvaje ‘na rredda quase fatta…),troppi vvacante, suffrenno ‘ncuntinuazzione ll’attacche d’ ‘o Chelsea.A pparte ca tene ancòra ‘ncopp’â cuscienza ‘a rredda signata dô Chelsea ô san Paolo!
CAMPAGNARO 5 Serata ‘a scurdà. Primmo tiempo ‘e granna difficultà.Spisso fora pusizziona. Però ’a siconna rredda s’ ‘o Chelsea nun fuje corpa soja, ma ‘e De Sanctis ca perdette ‘a lengua e nun chiammaje ‘a palla, ubbriganno ‘o Toro, ca purtroppo sta attraverzanno ‘nu periodo ‘e fromma scadente, a mannà ‘ncorner(ro).
ZUNIGA 5– Facette quacche bbona jucata , ma se strafucaje ‘na rredda retissanta e cierti ccose nun se perdonano!
INLER 6,5 Segnaje ‘na granna rredda ca ce illudette, po però sbagliaje quacche ppassaggio e se perdette a Ivanoviccio ‘nnuccasione d’ ‘a quarta rredda. ‘Na dimanna: ma pecché tira sempe cu ‘o pere mancino quanno va meglio cu cchillo ‘e dritta?
GARGANO 5,5 – Viguruso e cchino ‘e cegna comme a ssempe,ma tatticamente poco urdinato sbagliaje cchiú ‘e ‘na vota pusizziona ‘ncampo. Peccato pe ‘nu bbellu tiro ca nun avette bbona sciorta!
MAGGIO 6,5 – Fuje custretto a ascí doppo sulo trentaseje minute, pe ‘na cianfata avuta e ‘a mancanza soja se facette sèntere assaje pe tutta ‘a rencontra. ( dô 37°DOSSENA 4 – ‘O peggio d’ ‘o mazzo. Pe mme nun è manco ‘nu jucatore ‘e serie C! Maje ‘mpartita, appesantuto e ppoco prisente sia annante ca arreto, ajzaje ‘ngenuamente ‘o vraccio cundannanno ‘o Napule a subbí ‘nu ricore dicisivo p’ ‘o tre a uno!)
HAMSIK 5,5 – All’attivo ‘nu paro ‘e prucrissioni e ‘nu granne tiro a vvolo. Comme spisso lle succede, sparette spisso dâ rencontra e nun riuscette maje a ‘nfelarse dinto a ll’area. (Dô 106° PANDEV s.v.)
LAVEZZI 5 – Se dètte da fà, ma aizaje pórvera; purtroppo dint’ â prova d’ ‘a cunzacrazzione europea, ‘o Pocho se dimustaje urdinario (anonimo) e ppoco cuncreto, risultanno mentalmente distratto e assente.
CAVANI 5,5 – Tantu e core e ggenerosità, ma ‘a mira sotto porta nun fuje all’aldezza d’ ‘a rinumanza soja:fallette ddoje bboni uccasione ‘a duje passe. ô siconno tiempo avette pochi pallune ‘a jucà, ma sbrugliaje quacche situazziona jenno a ajutà ‘a scuatra ‘ncupertura. Poco servuto,sparette pure isso dô juoco durante cierti mumente d’ ‘a rencontra.
All. MAZZARRI 4,5 – ‘E suonne fernesceno a ll’arba; chillo ‘e Mazzarri fernette sotto mezanotte e fernette malamente. ‘A scuatra soja custruette sulo ô pprincipio, po avasciaje troppo ‘o baricentro, nun ripartette cchiú e mancaje d’ ‘a cegna e d’’a cazzimma nicessarie .’O cagno ‘e Pandev(vo) fuje tardivo (s’êsse avuto fà trasí assaje primma ô posto ‘e ‘nu spaisato Dossena passanno a ‘na difesa a cquatto), mentre nun se capisce addó vuleva apprudà facenno trasí a Vargas(so) quanno fósse stato meglio fà trasí a Fernandez(zo) comme belliero (ariete) uffenzivo. ‘A serata d’ajere, dulorosa,certamente à ‘mparato coccosa ô misterro cuano; allimmeno accussí spero!
Arbitro 4,5 ‘Stu nnacchennello tedesco facette ‘a parte ‘e don Benedettocroce: addó vedette (dànno ‘nu ricore ê ‘ngrese) e addó cecaje (nun dànnalo a nnuje); p’ ‘o riesto siscaje sempe contro ê cuane cunzentenno ê ngrese, senza sanziunarlo maje, ‘nu juoco viulento, perdite ‘e tiempo e sceneggiate cazzemmose. Dètte ‘nu ricore justo a lloro, ma nun vedette chillo ca ce attuccava a nnuje! Collina certamente nun ce favurette mannanno a ‘stu trentasejenne avvucato ‘e Monaco!
E cuncludimmo dicenno ca tutto summato dâ rencontra d’ajeressere ‘e napulitane so’ turnate cu ‘nu poco cchiú ‘e sperienza e forze ànnu capito ca ‘mmiez’ô campo nce vo’ sí core e fforza , ma ce vo’ pure cegna, ‘ntelliggenza e cazzimma, tutte cose ca so’ mancate!
E mmo ch’è ffernuta cu ‘sta Ciampionsa, cuncentrammoce ‘ncopp’ ô campiunato… Ce aspetta ll’Udinese e ll’âmm’ ‘a fà ‘nu mazzo tanto!
Ce sentimmo, si dDi’ vo’, lunnerí ca vène speranno ca ‘ncampiunato fossemo cchiú furtunate e ca dummeneca ce ‘a scuntassemo cu ‘e janche e nnire ca ancòra pe poco stanno ‘a copp’ a nnuje !
Staveti bbe’!
R.Bracale Brak